Næsta ár sigla skipini á páskum og á jólum

Í ferðaætlanini hjá Strandfaraskipum Landsins komandi ár er økt sigling ásett um páskirnar og á jólum

- Brúkarar eftirlýsa, at skipini hjá Stransferðsluni skulu sigla meira um páskirnar og á jólum. Vit hava lurtað, og frá nýggjárinum verður siglingin økt.

Hetta sigur Johan Dahl, landsstýrismaður í vinnumálum, ið eisini umsitur samferðslumál í landsstýrinum.

Ítøkiliga ber tann betraða tænastan til brúkararnar hjá Strandfaraskipum Landsins í sær, at skipini sigla ein dupulttúr - tvs. aftur og fram eina ferð -langa fríggjadag, páskadag og fyrra jóladag.

Á tann hátt verður møguligt hjá fólki at ferðast høgtíðardagar, har ið tað higartil ikki hevur verið gjørligt.

- Landsstýrið vónar, at fólk taka væl ímóti hesi nýskipan, ið hækkar tænastustigið hjá Strandferðsluni, sigur Johan Dahl, landsstýrismaður.