Færri skúlabørn í ár enn fyri fimtan árum síðani

Í 2005 var næmingatalið í fólkaskúlanum knappliga 7.600. Tíggju ár seinni var tað minkað niður í 7.200. Frá 2015 til í ár hevur verið stórur fólkavøkstur. Men næmingatalið í fólkaskúlanum vaks einans við 100 í hesum tíðarskeiðinum.

2005-2015:
Frá 1. 7. 2005 til 1. 7. 2015 vaks samlaða fólkatalið í Føroyum við 540 fólkum. Kortini minkaði næmingatalið í fólkaskúlanum í sama tíðarskeiðið við 361 børnum. Nógv størsta minkingin var í framhaldsskúlunum við 415. Og í barnaskúlanum 1. - 7. flokk minkaði talið við 73 børnum. Tilsamans ein minking við 488 børnum. Móti hesum var ein vøkstur í forskúlaflokkum við 117 børnum.

2015-2021:
Tey næstu seks árini (1.7. 2015 - 1.7. 2021) vaks samlaða fólkatalið við 4.500 fólkum. Kortini vaks næmingatalið í fólkaskúlanum bert við 100 børnum. Allur vøksturin kom frá øktum næmingatali í serflokkum og forskúlaflokkum við 270 næmingum, meðan tað minkaði í barnaskúlanum 1. - 7. flokk við 128 og framhaldsskúlanum við 41.

Broytingin í næmingatali í landspørtunum

2005-2015:
Verður hugt eftir landspartabýtinum í hesum 10-ára skeiðinum, er nógv tann størsta minkingin í næmingatalinum í Suðuroy við 355. Haraftrat minkar í Megineysturoy, Sundalagnum og Sandoyarøkinum við 138. Ein samlað minking í hesum økjum er 493 skúlanæmingar. Upp móti hesum er bara ein lítil vøkstur í Tórshavnar- og Vesturøkinum.

2015-2021:
Í hesum tíðarskeiði, har næmingatalið tilsamans bert veksur við 101, er myndin sera fjølbroytt: ein vøkstur í Eysturoy við 107 og í Suðuroy við 96. Í Tórshavnar kommunu veksur næmingatalið bert við 40. Hinvegin minkar í Norðoyggjum við 73 og í Sundalagnum, Vesturøkinum og Sandoyarøkinum tilsamans við 69.

Kynsbýtið í fólkaskúlanum

Heilt fram til sjeynda flokk er ein lítil yvirvág av dreingjanæmingum. Tað skiftir í 8. og 9. flokki við meiriluta av gentum. Men tá tað so kemur kemur til 10. flokk og serflokkar, er stór yvirvág av dreingjum.

Hvussu eru útlitini tey komandi árini?

Sum nevnt frammanfyri, so er næmingatalið í fólkaskúlanum ikki økt, heldur minkað eitt sindur tey síðstu fimtan árini, hóast tað er nakað ymiskt, hvussu gongdin hevur verið í ymsu økjunum í landinum. Í framrokningini hjá Hagstovuni av fólkatalinum sæst, at í aldursbólkinum 5-15 ár er ein lítil vøkstur tey næstu 10 árini við umleið 430. Ein triðingur av vøkstrinum verður í Tórshavnar kommunu, og tveir triðingar í øðrum kommunum í landinum. Hyggja vit 20 ár longur fram í tíðina, vísir framrokningin eina lítla minking í hesum aldursbólkinum. Tað er Tórshavnarøkið, ið hevur eina lítla minking og ein lítil vøkstur uttan fyri Havnina.