Eysturbúgvin og Vesturbúgvin hava fiskað gulllaksakvotuna

 Eysturbúgvin og Vesturbúgvin komu á Kollafjørð tíðliga í morgun við 225 tonsum av gulllaksi, sum teir skulu landa til Faroe Pelagic.

Teir hava nú fiskað sín part av gulllaksakvotuni, kvotan er ímillum trý pør: Eysturbúgvin/Vesturbúgvin, Vestmenningur/Skoraberg  og Stjørnan/Polarhav. Samlaða gulllaksakvotan er 12.000 tons.

Teir byrjaðu fiskiskap sunnast í føroyskum sjógvi, men hava nú roynt í eystara kanti av Føroya Banka.

Tá ið Eysturbúgvin og Vesturbúgvin hava landað, fara teir á beding hjá Mest í Havn, tað kemur at taka 14 dagar. Helst fara teir til makrelfiskiskap, tá ið farið verður avstað aftur.