Altjóða Holocaustdagur í Fuglafirði

Á Holocaustdegnum fara vit hesuferð at varpa ljós á Ukraina í dag og á fólkamorðið Holodomor, sum fór fram í Ukraina fyri 90 árum síðan. 

Í løtuni verður skráin løgd, men vit kunnu avdúka, at eins og undanfarin ár verða forvitnisligar framløgur og samrøður á skránni. Næmingarnir fáa innlit í ukrainska søgu og mentan, støðuna í dagsins Ukraina og um Holodomor, sum ukrainar nevna tíðarskeiðið 1932-1933, tá russiski einaráðisharrin, Stalin, legði alla kornframleiðslu í Ukraina um og tømdi korngoymslur í landinum. Hetta elvdi til hungursneyð í Ukraina og fleiri milliónir lótu lív. 

Fuglafjarðar skúli verður vertur á Altjóða Holocaustdegnum 2023. Samstundis sum at tiltakið verður í skúlanum í Fuglafirði, verður tað eisini stroymt til allar hinar skúlarnar. Dagurin var upprunaliga ætlaður hádeildum burturav, men áhugin er vaksin fyri tiltakinum, so at í ár bjóða vit tí umframt øllum hádeildum, eisini eftirskúlum, miðnáms- og yrkisskúlum við. 

Nám og Amnesty International Føroyar eru fyriskiparar av tiltakinum, sum Ólavur í Geil samskipar.