Sandavágs Talvfelag vann eisini steypakappingina

Í gjár var Steypakapping og Gallaveitsla fyri telvarar á Gjáargarði.

Sandavágs Talvfelag, sum fyrr í ár vann FM, gjørdist eisini vinnari av Steypakappingini í 2014. Tað var tó í stórari kapping við bæði Havnar Talvfelag og Klaksvíkar Talvfelag. Tá ið liðugt var at telva, stóð á jøvnum millum ST og HT bæði høvdu 44 stig og KT lá beint aftanfyri við 43½ stigi. Umdystur skuldi tí til fyri at finna vinnaran og tá vann Sandavágs Talvfelag sannførandi 9-3 í snartalvi á Havnar Talvfelag.

Liðini ið vóru við í Steypakappingini vóru: Sandavágur1, Sandavágur2, Klaksvík1, Klaksvík2, Havnin og Vestmanna.

Ársins stjørnuskot gjørdist Eli W. Finnson úr HT.

Ársins telvari gjørdist Høgni E. Nielsen úr ST.

Aftaná talvkappingina var Gallaveitsla hildin á Gjáargarði.