Norðborg landar í Ánunum í morgin

 Tey flestu svartkjaftaskipini komu inn í gjár og hava landað í Fuglafirði. Í dag kom Norðborg á Fuglafjørð har teir pumpa 150 tons av lýsi í tangarnar hjá Havsbrún - Næraberg kom á Kollafjørð seinnapartin í dag.

Norðborg skal landa í Ánunum í morgin, teir hava 1.260 tons av frystum, eisini hava teir eini 70 tons av mjøli.

Vit tosaðu við skiparan Jón Rasmussen fyri løtu síðan. Hann sigur, at teir mánadagin fara i dokk á Skála, har ymiskt viðlíkahald skal gerast, Jón roknar við, at tað kemur at taka einar 10 dagar - víðari segði hann, at skipið nú verður 5 ára gamalt og tí er altíð okkurt, sum skal eftirhyggjast.

Jón Rasmussen roknar við, at teir verða klárir at fara til fiskiskap aftur um 14 dagar.