Nakað fleiri løntakarar enn í summar

Síðani mai hevur ein lítil framgongd verið hvønn mánaða í talinum á løntakarum. Í september vóru 23.855 løntakarar, og tað er áleið tað sama sum í juni 2012.

Veturin 2010, tá eitt nú Fisikavirking lat aftur, fækkaðust løntakararnir við 1000 fólkum. Síðani hevur talið sveiggjað, men er so smátt á veg uppaftur Tó eru enn 500 færri løntakarar enn á vári 2010.
 

Privata tænastuvinnan eigur framgongdina
Tá hugt verður eftir løntakarum í vinnugreinum, ber ikki til at árstíðarjavna, tí sveiggini í fiskivinnuni eru so stór og óreglulig. Tá er frægasti hátturin at samanbera við sama mánað árið fyri. 

Tað er ein lítil framgongd í fiski- og alivinnuni og í byggivinnuni. Stóra framgongdin og orsøkin til samlaðu framgongdina síðani 2012 er í privatu tænastuvinnunum. Í september í ár vóru 8.138 løntakarar í privatu tænastuvinnunum, tað eru 323 fleiri enn í fjør, tað er ein framgongd uppá 4,1%.
Í almennum tænastum vóru 8.751 løntakarar í september, og tað eru 115 færri enn fyri einum ári síðani.

Gongdin í handli og umvæling
Í privatu tænastuvinnuni er eitt nú handil ogumvæling. Henda vinna er  sera viðkvom fyri búskaparligum rembingum. Í uppgangstíðunum løgdust løntakarar aftrat í handilsvinnuni, og flest vóru tey í 2008, tá tað vóru 3.300 løntakarar.

Síðan kom fíggjarkreppan og longu í 2010 vóru tað 400 færri í handilsvinnuni, tað er ein afturgongd upp á yvir 10%. Í 2010, 2011 og 2012 vóru løntakararnir í handili og umvæling á sama lága stigi, men í september 2013 kvinkaði talið upp á 3050 løntakarar - framvegis færri enn í 2008, men áleið tað sama sum í 2004 og 2005. 

Stutt um árstíðarjavning og trendin
Árstíðarjavnað tøl eru reinsað fyri árstíðaravvik, sum t.d. afturvendandi sveiggið í virkseminum millum vár og summar, heyst og vetur. Hetta merkir, at til ber at hyggja eftir gongdini mánað fyri mánað, uttan at samanberingin verður órógvað av regluligum sveiggjum millum árstíðirnar. 
Í trendinum er harumframt lagt upp fyri øðrum óreglusemi í mánaðarligu tølunum, og tá sæst tann undirliggjandi langtíðargongdin í lønunum.
Til ber at lesa meira um árstíðarjavning her 

Fleiri og nágreiniligari tøl eru at síggja í hagtalsgrunninum