KÍF aftur ovast í Atlantic Airways-deildini

Eftir tepra sigurin í Klaksvík í kvøld á Team Klaksvík, hevur KÍF aftur lagt seg fremst í Atlantic Airways-deildini, tó deila teir plássið við VÍF, bæði KÍF og VÍF hava 27 stig, men innanhýsis og í málmuni liggur KÍF omaná.

Dysturin í Klaksvík gjørdist tættur og spennandi allan vegin, bæði í fyrra og seinna hálvleiki skiftust liðini um at liggja omaná, men KÍF gjørdist drúgvari í endanum og vann tepurt 30-32 eftir at støðan í hálvleikinum var 16-17 til KÍF.

Hin dysturin, millum H71 og StÍF, sum var leiktur í Hoyvíkshøllini, endaði við javnleiki 21-21 eftir at støðan í hálvleikinum var 9-15 til StÍF. StÍF førdi allan dystin, men H71 fekk javnleik í seinasta minutti.

KÍF, VÍF, StÍF, H71 og Team Klaksvík hava 4 dystir eftir at leika, ímeðan Kyndil og Neistin hava 5 dystir eftir.