Innflutningurin fyrstu sjey mánaðirnar

Tá tølini fyri fyrra hálvár vórðu kunngjørd, vístu tey stóran vøkstur.

Nú tá tølini fyri juli mánað verða løgd aftrat, broytist myndin nakað, og samlaði innflutningurin uttan skip og flogfør minkar 1%.

Fyri innflutningin til húsarhaldsnýtslu varð vøksturin fyri januar-juni uppgjørdur til 7%, og var tað serliga, tí munandi meir varð innflutt í juni í ár enn í juni í fjør. Men fyri juli mánað er myndin tann øvugta, tí í juli í ár er munandi minni innflutt enn í juli í fjør. Samanlagt er úrslitið fyri tíðarskeiðið januar-juli, at vøksturin í innflutninginum av vørum til beinleiðis húsarhaldsnýtslu er 4%.

Ivi hevur verið sáddur um innflutningtølini fyri húsarhaldsnýtslu, eisini eftir at Hagstovan gjørdi eina rætting í tølunum fyri fyrstu seks mánaðirnar, sum viðførdi eina broyting millum tveir nýtsluvørubólkar. Hagstovan og TAKS hava í tí sambandi nú gjørt eina eftirkanning av innflutningstølunum, sum staðfestir, at skeivleikar ikki eru í almannakunngjørdu tølunum.