Eplafestivalurin er avlýstur

Nevndin í Veltuni avgjørdi á fundi í gjárkvøldi at avlýsa ársins eplafestival.

Nú støðan við korona-smittuni broyttist so nógv til tað verra, heldur nevndin tað ikki vera ráðiligt at skipa fyri so stórum tiltaki.

Eplafestivalurin, sum seinastu fimm árini hevur verið hildin í Trøðum á Sandi, samlar nógv fólk. Í fjør bleiv mett at yvir 3000 fólk vitjaðu í Trøðum henda dagin. Hetta er ov stórt tiltak at fara í holt við, nú støðan er so ótrygg sum hon er.

Ársaðalfundur var hildin beint fyri ??lavsøku og á fundinum í gjárkvøldið skipaði nevndin seg eisini. Jóannes Johannessen heldur fram sum formaður, næstformaður er Gunnar Bjarnason og nývaldur nevndarlimur er Dagunn Jógvansdóttir Clementsen.

Næsti eplafestivalur verður 2. oktobur 2021.