Autorisatiónslógin í Løgtingið

 Tíðindaskriv

Autorisatiónslógin í Løgtingið

Á landsstýrisfundi í gjár fekk Karsten Hansen, landsstýrismaðurin við heilsumálum, undirtøku fyri at leggja autorisatiónslógina fyri Løgtingið. Heilsumálaráðið hevur í eina tíð, í samstarvi við Ministeriet for Sundhed og Forebyggelse, arbeitt við at tillaga autorisatiónslógina til føroysk viðurskifti. Lógin hevur verið til hoyringar hjá føroyskum og donskum myndugleikum, er tillagað hoyringssvarunum og er nú klár at leggja fyri Løgtingið.

Í galdandi lóggávu viðvíkjandi heilsustarvsfólki í Føroyum eru ongar ásetingar um løggilding av kiropraktorum, ergoterapeutum, fysioterapeutum, optikarum ella heilsurøktarum. Við at seta autorisatiónslógina í gildi fyri Føroyar verður løggilding fyri hesar bólkar av heilsustarvsfólkum lógarásett. Harumframt verður lóggávan dagførd viðvíkjandi øllum hinum heilsustarvsfólkunum, ið eru nevnd í kongligu fyriskipanini.

Ásetingar um løggilding av heilsustarvsfólki í Føroyum finnast í løtuni í 12 ymiskum kongligum fyriskipanum. Kongligu fyriskipanirnar eru settar í gildi yvir eitt drúgt áramál. Tann fyrsta: ???kongelig anordning nr. 35 af 26. februar 1935 for Færøerne om udøvelse af lægegerning??? við seinni broytingum varð sett í gildi í 1935, meðan tær seinastu, um bioanalytikarar og radiografar, vórðu settar í gildi í 2005.

Í Danmark vórðu allar lógirnar um løggilding av heilsustarvsfólki samlaðar í einari lóg (autorisationsloven) í 2006. Broytingar eru síðani javnan gjørdar í lógini. Av tí, at autorisatiónslógin ikki enn er sett í gildi í Føroyum, eru flestu av omanfyrinevndu kongligu fyriskipanum ikki dagførdar.

Í uppskotinum eru ásetingar um løggilding av læknum, sjúkrarøktarfrøðingum, tannlæknum, kiropraktorum, jarðarmøðrum, ergoterapeutum, fysioterapeutum, bioanalytikarum, kliniskum diætistum, radiografum, bandagistum, kliniskum tannteknikarum, tannrøktarum, optikarum, fótterapeutum og heilsurøktarum.

Umframt hetta, eru eisini aðrar betringar í mun til galdandi lóggávu. Eitt nýtt kapittul er um sjúklingajournalir, herundir um journalføring, innihaldið í journalum og varðveitslu av journalum. Við at seta hesar reglur í gildi í Føroyum, verður bøtt um sjúklingatrygdina og um góðskuna av veitingum í sjúkrahúsverkinum. Í § 14 verður ásett, at løggild heilsustarvsfólk missa rættin til sjálvstøðugt fakligt virksemi, tá ið tey fylla 75 ár. Í kap. 25 eru nýggjar ásetingar um kosmetiska viðgerð í sjúkrahúsverkinum. Alt broytingar, ið betra um tænastuna og góðskuna í sjúkrahúsverkinum.

Fyrimunurin við at hava ásetingarnar um løggilding av heilsustarvsfólki í einari lóg er eisini, at møguligt er at hava ásetingar, ið eru felags fyri øll heilsustarvsfólk í somu lóg. Í hesari lóg eru t.d. felags ásetingar galdandi fyri øll heilsustarvsfólk um endamál við løggildingini, fráboðan av løggildingini, frátøku, fráskrivan og endurútvegan av løggilding, umframt ymiskar ásetingar um mannagongdir í hesum sambandi. Felags ásetingar eru eisini um revsing av heilsustarvsfólki í sambandi við brot á ásetingar í lógini.

Landsstýrismaðurin í heilsumálum fer at leggja uppskotið fyri Løgtingið beint eftir ??lavsøku.

Heilsumálaráðnum 26. juli 2013