Talv: Framvegis stavn um stavn

Tað stendur framvegis á jøvnum millum oddaliðini í landskappingini í talvi. Sandavágsmenn og havnarmenn fylgjast í toppstríðnum. Bæði hava 17½ stig hvørt eftir seks av tíggju umførum.

Seinnapartin verður telvað í øllum deildum. Tá eru dystirnir í sjeynda umfari á skránni.

Dystirnir í fyrsta umfari í seinnu hálvu í landskappingini broyttu ikki støðuna. Sætta umfar var hitt fyrsta í nýggja árinum eftir steðgin um árskifftið. Sjøtil var settur á hetta umfar fyri tveimum vikum síðani, men korona hevur tarnað so mikið, at ikki fyrr enn fríggjakvøldið í hesi vikuni var alt liðugt.

Hvørki av oddaliðunum var heilt sannførandi. Bæði vunnu sínar dystir, men sigrarnir vóru teprir. Vágamenn fingu dygga mótstøðu frá Vestmanna Talvfelag, sum er aftast í deildini. Óvæntað koppaði Ingolf Debes á fjórða borði fleirfalda føroyameistaranum Torkil Nielsen, sum forkom sær allari støðuni í einum leiki, tá hann brádliga snávaði. Slík mistøk kunnu sjálvt teir bestu stundum gera.

Brøðurnir Rógvi og Høgni vóru sum vant eirindaleysir á toppborðunum hjá vágamonnum, men á triðja borði var javnt millum Silas Eyðsteinsson og Martin Brekká. 

Í hinum báðum dystunum var talan um innanhýsis uppgerðir - havnarmenn móti havnarmonnum og klaksvíkingar móti klaksvíkingum. Feløgini hava hvør síni tvey lið í bestu deildini. A-liðið hjá Klaksvík vann 3-1, men sum vant hevði A-liðið hjá Havnini sítt stríð av B-liðnum. Unga stjørnuskotið Luitjen Akselsson Apol mátti leggja kongin á fjórða borði. Fjøruti ár eldri mótstøðumaðurin telvaði í síni tíð á liði saman við abba Luitjeni. 15 ára gamli Luitjen hevur annars staðið seg sera væl í vetur, og mennist í hvørjum.

Helgi Dam Ziska og Olaf Berg vunnu sannførandi á ovaru borðunum á A-liðnum hjá Havnini, men á triðja borði mátti Carl Eli Samuelsen sættast við remis móti Margari Berg, sum hevur góða úrtøku í dystunum móti A-liði felagsins.

Í hinum deildunum gongur eisini javnt á í toppstríðnum.  

Í stuttum kann sigast, at í 2. deild kýta kollfirðingar seg at vinna seg upp í bestu deildina aftur, í triðju deild liggja toftamenn framvið at flyta upp í næstbestu deildina, og í fjórðu deild liggja gøtumenn á upplfytingarkós.

Topparnir í deildunum eru hesir:

Kollafjørður 18 stig

Klaksvík 17½

Sandavágur 13½

Í alt 6 lið

Toftir 15½

Havnin 14½

Kongshavn 13

Í alt 6 lið

Gøta 14

Havnin 14

Sandavágur 12

Í alt 9 lið