Kvinnuunglingarnir hjá SÍ eru føroyameistarar

SÍ - Fleyr 3-1 (25-27, 25-17, 25-14, 25-16)

Finalan fyri kvinnuunglingar varð leikt í høllini í Kollafirði í kvøld. SÍ og Fleyr høvdu leikt seg í finaluna, og var hetta tí ein endurtøka av steypafinaluni fyrst í mars, sum Fleyr tá vann.

Talan gjørdist ongantíð um ein veruliga spennandi dyst í kvøld. Til tað vóru sørvágskvinnurnar ov sannførandi. Tað tóktist, sum tær vóru stálsettar at geva venjara sínum Rajko Petrovic hendan sigurin, áðrenn hann gevst, sum venjari teirra. Hetta var finala nr. 200 hjá Rajko.

SÍ var á odda í øllum fýra teimum leiktu settunum, men í fyrsta setti megnaði Fleyr tó at toga seg framum, eftir at SÍ hevði haft tríggjar settbóltar, og vinna hetta settið við 25-27. Tey næstu trý settini var SÍ munandi betri, og ongin ivi var nakrantíð um, at tær fóru at vinna hesi settini og harvið føroyameistaraheitið.

Besti leikari hjá SÍ í kvøld var Sofía Weihe Simonsen, og besti leikari hjá Fleyr var Sára Rannváardóttir Vatnhamar.

Hetta var triðsíðsta finalan hjá legendariska venjaranum Rajko Petrovich fyri SÍ. Rajko gevst sum venjari hjá SÍ eftir hetta kappingarárið, og einastu dystirnir hann hevur eftir á hesum sinni eru finalurnar hjá besta kvinnuliðnum hjá SÍ. Her leika tær fyrru finaluna mikukvøldið kl. 19.30 móti Fleyr í Kollafirði, og síðani seinnu finaluna í Havn leygardagin kl. 14.00.