Ítróttur

Góð føroysk úrslit á fyrsta degnum í Tórshavn Open í dart

Fyrstu pílarnir í Tórshavn Open 2023 vórðu kastaðir á Glasi fríggjakvøldið, tá kappast var í tvímansleiki. Kappingin í tvímansleiki er ein upphitingar-kapping til tær báðar altjóða skrásettu kappingar í einmansleiki, sum eru leygardagin og sunnudagin.

2023-04-01 20:27 Author image
Jóanis Nielsen
placeholder

Bronsuheiðursmerki hjá kvinnum og monnum

Hjá kvinnum vóru 9 pør við í kappingini, meginparturin útlendskir leikarar. Í fjórðingsfinaluni hittust tvey av føroysku pørunum, og tí var heilt víst, at okkurt føroyskt par kom í hálvfinalurnar. Dysturin endaði við, at Birthe Sikivat/Joan Edvør Jacobsen vunnu á Beintu Joensen/Nadju Tróndardóttir. Í hálvfinaluni var tó ikki nógv at gera hjá Birthe/Joan Edvør, tær taptu greitt móti klárt sterkasta parinum í kappingini, svensku Anna Forsmark/Maud Jansson, sum eisini endaðu við at vinna kappingina.

Enn fleiri bronsuheiðursmerki monnum

Hjá monnum vóru 28 pør við í kappingini, helvt um helvt føroyskir og útlendskir leikarar.

Tá komið var framm til fjórðingsfinalurnar, vóru framvegis føroyskir leikarar við í øllum dystunum. Uni Árting/Jan McIntosh taptu greitt móti einum svenskum pari og Marjus Hansen/Heri Kallsoy høvdu heldur ongan møguleika móti sterkum leikarum úr Hollandi/Onglandi.

Betur gekk hjá Hans Eivind Olsen, sum spældi saman við Roland Lenngren úr Svøríki. Teir vunnu sera tættan dyst móti einum norskum pari. Jan Erik Fjallstein/Jón Johansen gjørdu fullkomuliga bart í teirra fjórðingsfinalu, tá teir vunnu ein flottan 4-1 sigur á einum donskum pari. Í hálvfinaluni var tó ikki nógv orka eftir hjá føroysku spælarunum, sum allir taptu greitt. So tað endaði við bronsu til tríggjar føroyskar leikarar. Sviarnir Edwin Thorbjørnsson/Bjørn Lejon endaðu við at vinna kappingina.

Allan leygardagin og sunnudagin verður spælt í einmansleiki. Rás1 hjá Televarpinum sendir beinleiðis frá avgerðandi dystunum leygarkvøldið frá kl 19 og sunnukvøldið frá kl 18.


Úrslit Tórshavn Open tvímansleikur kvinnur

  1. Anna Forsmark/Maud Jansson, Svøríki
  2. Brynja Jónsdóttir/Isabelle Nordskog, Ísland
  3. Elin Eikesdal/Ingibjørg Magnusdóttir, Noreg/Ísland
  4. Birthe Sikivat/Joan Edvør Jacobsen, Føroyar


Úrslit Tórshavn Open tvímansleikur menn

  1. Edwin Thorbjørnsson/Bjørn Lejon, Svøríki
  2. John Scott/Erik van Manen, Ongland/Holland
  3. Hans Eivind Olsen/Roland Lenngren, Føroyar/Svøríki
  4. Jan Erik Fjallstein/Jón Johansen, Føroyar

Vinarliga broyt tínar kennifíla - og privatlívsstillingar fyri at síggja hetta innihald

placeholder