Fara nú at kanna hví eldur kom í

Um middagsleitið í gjár fekk løgreglan eina fráboðan um ein stóran eld í sethúsum í Sørvági. 

Alt bleiv sent á staðið, og hevði tað eisini við sær, at flogvøllurin bleiv stongdur, tí sløkkiliðið har eisini fór at sløkkja eldin.

Av løgreglustøðini verður í morgun upplýst, at eingin fólkaskaði var, men húsini fóru sera illa. Nøkur grannahús fingið eisini skaða.

Sørvágs sløkkilið hevur havt brandvakt í nátt. Løgreglan fer so skjótt tað ber til, at kanna hví eldur kom í húsini.

Annars verður upplýst, at sera nógv fólk vóru á G! Festivalinum, men har gekk alt friðaligt fyri seg.

Løgreglan hevur tikið tveir útlenskar ferðaleiðarar, sum hava arbeitt í Føroyum ólóligt. Talan er um fólk, sum ikki eru úr Europa. Tann eini hevur fingið sekt og er útvístur úr Føroyum. Hitt málið er ikki avgreitt enn.