VÍF er nú trý stig á odda í Okkara-deildini

Tað hava verið 3 dystir leiktir í Okkara-deildini hjá monnum í hondbólti um vikuskiftið.

Í gjár tók Neistin ímóti oddaliðnum VÍF. Tað var heimaliðið ið legði betri út, og var á odda 5-3 eftir 7. min. Hálvleiksstøðan var 13-13. Í seinna hálvleiki fekk Neistin bert 10 mál, meðan VÍF fekk 16. VÍF vann dystin 23-29. Sjúrður Olsen fekk 7 mál fyri VÍF, og Tróndur Kragesten fekk 6 mál fyri Neistan.

Meistarnir frá í fjør H71 tóku í dag ímót Team Klaksvík. Tað skuldu ganga heili 16. min. til Team Klaksvík fekk sítt fyrsta mál, og tá hevði H71 longu fingið 8. Men tá kom Team Klaksvík eisini ordiliga fyri seg, og var støðan 14-12 í hálvleikinum. H71 vann dystin 30-24. Fyri H71 fingu 4 spælarar 5 mál hvør, teir vóru Rùni V. Højgaard, Leivur Mortensen, Brandur Halgirson og Peter Krogh. Sámal á Tjaldrafløtti fekk 10 mál fyri Team Klaksvík.

Mest spennandi dysturin hetta vikuskiftið var á Hálsi í Havn í dag, tá ið Kyndil tók ímóti StÍF. StÍF fekk eina góða byrjan uppá dystin, og vóru á odda 3-7 eftir 17. min. Hálvleiksstøðan var 10-11 til StÍF. Kyndil kom betri frá byrjan, og eftir 48. min. var støðan 18-14 til Kyndil, men so kom gongd aftur á hjá StÍF, sum vann dystin 22-23. Rógvi D. Christiansen fekk 5 mál fyri Kyndil, og Jóannes Prestá fekk 8 mál fyri Strandingar.

Støðan:

Dystir	Vunnin mál	Tapt mál	Munur	Stig
VÍF	5	138	116	22	9
KYNDIL	6	140	127	13	6
NEISTIN	5	121	113	8	6
H71	5	121	116	5	6
STÍF	5	116	132	-16	4
KÍF	5	118	120	-2	3
TEAM KLAKSVÍK	5	115	145	-30	2