Tummas Pauli: - Vit høvdu ikki væntað at komið í finaluna í ár

Í morgin møtast Neistin og Kyndil í steypafinaluni hjá monnum í hondbólti. Vit hava fingið Tummas Paula Hanusarson hjá Kyndli at svara nøkrum spurningum.

Hvat væntar tú tær av finaluni? 

- Eg gleði meg sera nógv til finaluna. Nýggja høllin er væl egnað til ein slíkan dag, og eg vænti ein ótrúliga góðan stemning í høllini. 

Hvat skal rigga hjá tykkum fyri at tit skulu vinna? 

- Vit mugu verða grammir í verjuni, fyri at steðga teirra álopsspæli. Teir hava øgiliga nógvar streingir at spæla uppá. Rasmus Søby og Tróndur Kragesteen siga seg sjálvt, men afturat teimum so eru teir sera væl mannaðir á vinstra bakki við Dánjali Ragnarsson og Jónsveini Dulavík. Hesir báðir hava avgjørt dystir móti okkum, m.a. tá Rasmus Søby fekk reytt kort tíðliga í einum dysti fyrr í ár. 

Hvat er sterkasta vápnið hjá tykkum?  

- Stemningurin og samanhaldið á liðnum er avgjørt okkara styrki. Vit høvdu ikki væntað at komið í finaluna í ár, so vit kunnu spæla púra frítt. 

Hvat er sterkasta vápnið hjá mótstøðuliðnum og veikasta? 

- Síðstu tvey árini hevur gott verjuspæl verið eyðkenni hjá teimum, í góðum samstarvi við nógv besta málmann í landinum, Nicholas Satchwell. Við hesum fáa teir nógv mál í skjótálop, har Høgni Zachariasen gongur undan. Eg dugi ikki at síggja nakran veikleika á teirra liði. Teir hava tveir danskar spælarar á liðnum sum brúka alla teirra tíð upp á hondbólt, meðan einastu pengarnir vit hava brúkt upp á leikarar í ár er ein longdur ferðaseðil til Janus Jakobsen, sum síðstu árini hevur fingist við kurvabólt. 

Hvat endar dysturin við? 

- Tað er vónleyst at spáa hvussu dysturin endar, men vónandi kunnu vit fylgja teimum til tað síðsta, so vit fáa eina spennandi finalu. 

Eru allir tøkir?

- Fyrsti málmaðurin, Jan Pauli Toft Johannesen, fær framvegis ikki spælt eftir at hann fekk ein bólt í eyga í hálvfinaluni, og Rókur Akralíð, sum var høvuðsmaðurin hjá okkum í verjuni fór av landinum á jólum.