Stjørnan vil longur fram

Klaksvíksdamur vóru at kalla einaráðandi í hondbólti í nullunum. Frá 2000 til 2010 vann Stjørnan FM-heitið seks ferðir og var í 10 steypafinalunum frá 2002 til 2011, har sjey teirra vórðu vunnar. Seinastu árini hevur Stjørnan tó runnið aftaná.

??? Tað krevst meira, til vit aftur kunnu teljast millum bestu kvinnulið í Føroyum, men tað gongur rætta vegin. Tað sigur Tóra Eliasen.

Stjørnan endaði á einum fimta plássi í fjør við 18 stigum. Tað er væl betri enn fyrraárið, tá tær endaðu á sætta plássi við bara seks stigum.

??? Málið er sjálvandi at gera tað betri enn í fjør. Vit spæla fyri at vinna og vilja gjarna vera við har tað er stuttligt.

Hópurin hjá Stjørnuni er at kalla tann sami sum í fjør, men er eitt ár eldri og eitt á búnari.

??? Eg vænti at vit geva øllum størri mótstøðu í ár. Eg vænti eitt kappingarár við nógvum torførum og spennandi dystum, og vónandi eitt javnt kappingarár, har øll liðini taka stig frá hvørjum øðrum, sigur Tóra Eliasen.

Stjørnan spældi sín fyrsta landskappingardyst um vikuskiftið, sum var móti Neistanum. Tær taptu við trimum málum. Sunnudagin skal Stjørnan spæla móti StÍF.