Atlantic Airways Tórshavn Marathon 2021

Fyri 17. ferð skipar Ítróttarfelagið Bragdið fyri marathonrenning í Føroyum. Renningin verður sunnudagin 6. juni.

Hættar tú tær ikki undir heilt ella hálvt marathon, kanst tú bæði renna 5,5 ella 10,5 km. Bragdið og Tórshavnar Kommuna, sum hjálpir við fyrireikingunum, leggja dent á, at sunnudagurin 6. juni verður ein renniveitsla fyri øll. Eisini ber til at ganga eitt hálvt marathon. Gongumarathon er skipað saman við Krabbameinsfelagnum. Tónleikur verður á rutuni í býnum og við málið, so rættiligt lív verður í høvuðsstaðið okkara.

Áhugin at luttaka er stórur, men enn er møguleiki at melda til á torshavnmarathon.com.

Atlantic Airways Tórshavn Marathon er eitt stór tiltak og vanliga koma rennarar úr øllum heiminum at renna saman við føroyingum. Orsaka av koronastøðuni er Atlantic Airways Tórshavn Marathon 2021 tó einans fyri fólk, sum búgva í Føroyum.

Runnið verður av Vaglinum, yvir við Strond, eftir ringvegnum niðan til R.C. Effersøesgøtu, oman til Skansan og so aftur yviri við Strond, Hvítanesvegin og norðureftir. Vendipunktið til hálvt marathon er beint áðrenn Sund og tey sum renna heilt marathon, renna til Kaldbaks og sama veg heim aftur. Komin til krossin Hvítanesvegur/Ringvegur, skal aftur rennast yviri við Strond og so beina leið niðan aftur á Vaglið.

Aftur í ár fara Rynkeby súkklarar at seta dám á stóra tiltakið.

Startnummur kunnu heintast á Torginum í SMS hósdagin kl. 14-18, fríggjadagin kl. 10-19 og leygardagin kl. 10-18. Sport 24 skipar fyri og nógv spennandi kann upplivast á Torginum hesar dagarnar.

Startskotið til Atlantic Airways Tórshavn Marathon verður á Vaglinum sunnudagin 6. juni kl. 13.00. Ferðslan verður tí avmarkað í býnum og á vegnum til Kaldbaksbotn og Kaldbak, men fryntlig vaktarfólk standa við síðuvegirnar og hjálpa fegin, um okkurt er. Vit vóna, at nógv fólk koma at stuðla teimum sum renna, bæði í býnum og á rutuni annars. Eitt smíl, eitt róp ella klapp ger undurverk fyri rennaran, so komið út á gøturnar, oman í býin ella onkra aðra staðni á rutuni og latið okkum øll gera hendan dagin til ein veitsludag.

Meira kunning um tiltakið sæst á heimasíðuni torshavnmarathon.com. Tórshavn Marathon er eisini á Facebook og Instagram.

Vit gleða okkum til stóra rennidagin og tit eru vælkomin við út á gøturnar.

Viðheft er faldari, sum lýsir, hvussu ferðslan verður skipan sunnudagin.

Atlantic Airways Tórshavn Marathon