Vága- og Norðoyartunnilin eiga at verða ókeypis

Samferðslubólkurin við tveimum umboðum úr hvørjum samgonguflokki samdist um farmaferju til Suðuroyar, lækka gjald í Eystur- og Sandoyartunlinum og frítt at koyra í Vága- og Norðoyartunlinum. Alt gjøgnumført uttan Vága- og Norðoyartunnilin.

Ein avtala skal verða ein avtala.

Loysnin við farmaferju til Suðuroyar kostar landskassanum leigu, rakstri og við verandi oljuprísum yvir 40 mió. kr. um árið. Eystur- og Sandoyartunnilin kosta í ár eyka 35 mió. kr. í veghaldi og 7 mió. kr. í lækkaðum prísum fyri pendlarar. Hetta er játtað á fíggjarlógini í ár. Kostnaðurin fyri ókeypis koyring í Vágatunlinum hevði kostað 2 mió. kr. um árið, netto. T.v.s. raksturin er 4 mió. kr., men ferðaendurgjaldið fyri tunnilin er 2 mió. kr. Hetta skal tó ikki játtast fyrr enn um eini 6 ár, tí tunnilin eigur pening. Norðoyartunnilin hevði kostað 4 mió. kr. netto um árið, men eisini her eru pengar á bók.

Okkara skipan hevur altíð verið, at veganetið verður goldið við vegskatti og brennievnisavgjaldi. Tó er avgjørt í ávísum og serliga stórum íløgum, at hava bummgjald fyri at rinda lánini aftur. Øll vilja ikki standa við hetta, men samgongan hevur gjørt avtalu um hetta og hon skal haldast.

Bygdir og oyggjar eru bundin saman við tunlum, brúm og byrgingum. Alt verður goldið við vegskatti og brennievnisgjaldi. Soleiðis eigur tað at verða.

Gásadalstunnilin: Ókeypis

Sumbiartunnilin: Ókeypis

Hovstunnilin: Ókeypis

Sandvíkartunnilin: Ókeypis

Gamli Hvalbiartunnilin: Ókeypis

Nýggi Hvalbiartunnilin: Ókeypis

Fámjinstunnilin: Verður ókeypis

Dalstunnilin: Verður ókeypis

Viðareiðistunnilin: Ókeypis

Tunlarnir Norður um fjall: Ókeypis

Nýggju tunlarnir Norður um fjall: Verða ókeypis

Byrgingin um Hvannasund: Ókeypis

Byrgingin um Haraldsund: Ókeypis

Kunoyartunnilin: Ókeypis

Trøllanestunnilin: Ókeypis

Tunnil til Djúpadal: Ókeypis

Mikladalstunnilin: Ókeypis

Ritudalstunnilin: Ókeypis

Villingardalstunnilin: Ókeypis

Leirvíkstunnilin: Ókeypis

Norðskálatunnilin: Ókeypis

Brúgvin um Streymin: Ókeypis

Kollfjarðartunnilin: Ókeypis

Leynatunnilin: Ókeypis

Eystur- og Sandoyartunlar: Bummgjald, sum samb. lóg skal burtur, tá lánini eru afturgoldin

Vágatunnilin: Bummgjald, hóast lánini langt síðan eru afturgoldin

Norðoyartunnilin: Bummgjald, hóast lánini langt síðan eru afturgoldin

Samgongan hevur avtalað at báðir seinast nevndu tunlar eisini skulu verða ókeypis, tí lánini eru afturgoldin.

Tann avtalan skal haldast.

Jørgen Niclasen, tingmaður