Spírar verður partur av Heimamissiónini

Kirkjuliga Heimamissiónin skrivaði í vikuni undir avtalu um, at talgildi sunnudagsskúlin Spírar frá nýggjárinum verður partur av barna- og familjuarbeiðinum hjá Heimamissiónini. Samstundis er Sólfríð Maria í Rók, sum hevur arbeitt við Spírum síðan stovnanina í 2016, sett í fulltíðarstarv hjá Kirkjuligu Heimamissiónini frá 1. januar 2026 sum samskipari fyri Spírum.

Spírar hevur sum endamál at geva børnum dygdargott, læruríkt og sansastimbrandi føroyskt mentanartilfar við støði í bíbliusøgum og kristnu siðalæruni. Áleið 120 sjálvboðin eru við í Spíraarbeiðinum, og ein rúgva av tilfari er framleitt seinastu árini, sum er frítt og lætt atkomuligt fyri børn á netinum – barnasendingar, sjónbandaløg, karaoke, sunnudagsskúlasangir, kreativa hornið, framløgur v.m. Spírar hevur eisini verið at sæð í Kringvarpinum, í Barnablaðnum, til gudstænastur, møtir og onnur tiltøk.

– Heimamissiónin hevur stórar ætlanir innan barna- og familjuarbeiði komandi árini, og eg fegnist um, at Spírar nú verður ein týðandi partur av hesum arbeiði, sigur Sólfríð Maria í Rók. Við hesum verður Spírar partur av einum størri felagsskapi innan kirkjuliga arbeiðið í Føroyum, og tað kann framtíðartryggja Spírar og skapa grundarlag fyri víðari menning komandi árini.

Yvirtøkan merkir ikki stórvegis fyri børnini, tí Spírar heldur fram sum vant við sama endamáli og í verandi líki. Heldur er tað ein styrki, at Spírar nú verður partur av einum størri felagsskapi, sum kann seta meira ferð á framleiðslu og útbreiðslu av Spírum framyvir. Ein framleiðsluætlan er longu gjørd fyri fleiri ár frameftir við nýggjum sendingum og innsløgum, ið føra hyggjaran ígjøgnum Bíbliunnar søgur á mest skapandi hátt. 

– Tá leiðslan fekk fyrispurning frá Sólfríð, um Spírar kundi blíva ein partur av Heimamissiónini, fóru vit beinanvegin inn í eitt jaligt samskifti, sigur Jákup Brúsá, aðalskrivari í Kirkjuligu Heimamissiónini. Spírar er eitt framúr gott konsept, sum er væl kent millum børn í Føroyum, og er í tráð við okkara strategisku ætlanum at styrkja barna- og familjuarbeiðið komandi árini. Vit síggja nú fram til, at Spírar framyvir verður ein náttúrligur partur av okkara barna- og familjuarbeiðið. 

Alt tilfar hjá Spírum er ókeypis og verður fíggjað av gávum. Mánaðarligi stuðulin hjá teimum, sum geva fast til Spírar, verður ikki ávirkaður, tí kontonummar eins og endamálið verða óbroytt.

Ynskir tú at stuðla Spírum, kanst tú lata eina gávu á konto 6460-569.499.1.

Spírar sjónbandalag: Lít á Gud