Mjølnir tók fyrstaplássið eftir sigur á Fleyr

Við 3-1 sigri á Fleyr sunnudagin legði Mjølnir seg fyribils á fyrstaplássið í Polestar-deildin; tvey stig frammanfyri SÍ, sum tó hevur spælt ein dyst færri. Samanumtikið var sigurin tryggur, tó at Fleyr í øllum settum var á odda, men tað var serliga ímóti endanum á settunum, at Mjølnir var stinnari.

Eftir at Fleyr hevði lagt seg á odda 15-14 í fyrsta setti, gekk av skriðuni, tí Fleyr vann bert eittans stig aftrat, og Mjølnir vann settið 25-16.

Heimaliðið var eisini væl við í øðrum setti og var á odda til miðskeiðis í settinum – eitt skifti við fýra stigum – men tá settið skuldi avgerast, vóru gestirnir úr Klaksvík skarpari og vunnu 25-20, eftir at Fleyr annars hevði bart seg upp á 20-21.

Fleyr fekk flúgvandi byrjan upp á triðja sett og fór framum 6-1 og økti so líðandi um munin, til settið varð vunnið 25-16.  

Fleyr bjóðaði aftur av í fjórða setti og legði seg á odda 15-12, eftir at Mjølnir hevði verið á odda fyrstu løtuna. Men eftir 16-14 til Fleyr vann Mjølnir fimm stig á rað og legði seg framum 19-16. Fleyr treiskaðist og stríddi seg upp á 21-22, men tá settið skuldi avgerast, var Mjølnir aftur stinnari og vann 25-21.

ÍF – Ternan 3-0 (25-21, 25-23, 25-12)

ÍF vann sín fyrsta sigur í ár, tá Ternan var á vitjan sunnudagin. Hjá Ternuni spældi nýggi kanturin úr Kanada, Aragona Nikolas Moser, sín fyrsta dyst, og hann munaði væl, tí bæði í fyrsta og øðrum setti beit Ternan væl frá sær, áðrenn avsmurningin í triðja setti.

Gaman í var Ternan ikki á oddan eina ta einastu ferð í dystinum, men í fyrsta setti kom Ternan upp á 21-22, áðrenn ÍF tryggjaði sær settið 25-21, og í øðrum setti kom Ternan heilt upp á 23-24, áðrenn ÍF vann settið 25-23 við sínum fjórða settbólti. Í triðja setti var kortini stórur munur, og ÍF vann lættliga 25-12.