Jóanis Nielsen
ÍSF hevur seinastu seks árini verið í eini menningartilgongd, sum var góðtikin og samtykt av aðalfundinum í vikuskiftinum. Starvsnevndin og umsitingin hevur saman við sambondunum arbeitt miðvíst við strategisku ætlanini seinasta árið.
- Hetta er ein stórur dagur, har vit í felag taka saman hendur um føroyskan ítrótt, sigur Elin Heðinsdóttir Joensen, forseti í ÍSF.
4 strategisk átøk
Strategiin hjá ÍSF fram til 2026 snýr seg um 4 átøk, sum sambondini í felag skulu taka sær av og so ein røð av átøkum savnaði undir einum, sum umsitingin hjá ÍSF tekur sær av. Felagsátøkini eru hesi:
- Øll skulu við
- Styrkja úrvalsumhvørvini
- Fjálga um sjálvboðin
- Ítróttagleði fyrst og fremst
Ein strategi ment í felag
Øll sambondini hjá ÍSF vóru boðin við í arbeiðið at menna strategiina. Fíggjarliga og fyrisitingarliga orkan er ymisk og tí fer eisini at vera munur á, hvussu langt sambondini hvør í sínum lagi røkka, áðrenn 2026. Tað verður virt og góðtikið. Tað sum hevur týdning er, at ein strategi er ment í felag, sum veruliga kann gera mun fyri føroyingar og føroyskan ítrótt.
- Sum forseti í ÍSF hevur tað verið ein heiður at standa á odda fyri hesum arbeiðnum. Vit hava verið ósamd og vit hava verið heit, men vit hava altíð strembað eftir semjuni. Eg tori at siga, at vit øll fegnast um úrslitið og kósina, sigur Elin Heðinsdóttir Joensen, forseti í ÍSF.
Strategiin hjá ÍSF 2022-2026 kann heintast her.
Sitandi forseti afturvald
Á aðalfundinum bleiv Elin Heðinsdóttir Joensen afturvald sum forseti í ÍSF. Nevndarval var eisini á skránni til aðalfundin, men bleiv nevndarvalið útsett til eykaaðalfund seinni í summar.
Í samband við aðalfundin fingu Jógvan Magnus “Eggaba” Andreasen (BSKF), Gunn Ellefsen (HSF) og Ingi Samuelsen (Umboð fyri menningarsambondini í ÍSF) handað gullnál ÍSF.
Ársfrágreiðingin hjá ÍSF kann heintast her.
Vinarliga broyt tínar kennifíla - og privatlívsstillingar fyri at síggja hetta innihald