Finnur Fríði og Høgaberg hava fiskað sild norðanfyri 67N

 Finnur Fríði og Høgaberg hava verið norðanfyri og leitað eftir sild. Teir fóru upp við íslendska markinum, norður um føroyska markið norðanfyri og í altjóða sjógv, teir leitaðu heilt norður um 67N - einar 330 fj. norður úr Kallinum, har teir truffu við, men sildin stóð sera spjadd, sigur Arni Hansen skipari á Finni Fríða, teir fingu tó 800 - 900 tons hvørt skipið - sildin er í góðum standi sigur Arni Hansen, støddin liggur um 350 gramm.

Finnur Fríði hevur um 900 tons, teir skulu landa til Varðan Pelagic tíðliga í morgin, Høgaberg hevur eisini har á leið, teir verða á Fuglafirði tíðliga í morgin og landa til Pelagos.

Í kvøld eru Tummas T., Norðborg, Gøtunes og Tróndur í Gøtu har norðuri, eisini eru trý norsk skip á leiðini har føroysku skipini eru.

Sagt verður frá vindi norðanfyri komandi dagarnar.