Rættargangslógin má endurskoðast og dagførast

Tað er stórur tørvur á at fáa eina nýggja rættargangslóg setta í verk fyri Føroyar. Tað var greiði boðskapurin hjá løgmanni, tá ið hann í morgun var á fundi í Tinganesi við Søren Pape Poulsen, løgmálaráðharra í Danmark. Rættargangslógin er rættiliga umfatandi, og inniheldur eitt nú reglur um dómstólarnar, skipanina hjá politinum og ákæruvaldinum, reglur fyri viðgerðir hjá dómsstólum av borgarligum rættarmálum og revsimálum os.fr.

"Rættargangslógin fyri Føroyar er rættiliga afturúrsigld. Talan er ikki einans um smávegis frábrigdi, men um sera umfatandi munir á lóggávunum. Fleiri enn 200 lógarbroytingar eru gjørdar í donsku rættargangslógini, sum ikki eru settar í gildi fyri Føroyar. Hetta er sera óheppið, tá Føroya rættur er ein samfeldur partur av tí donsku dómstólaskipanini, og fleiri dómar skulu roynast í landsrættinum og Hægstarætti,??? heldur Aksel V. Johannesen, løgmaður.

Umframt at vera løgmaður, varðar Aksel V. Johannesen eisini av lógarøkinum, herundir løgregluni. Løgmaður og danski løgmálaráðharrin skiftu eisini orð um ymisk viðurskifti hjá føroysku løgregluni.

Søren Pape er í Føroyum í hesum døgum og vitjar ríkismyndugleikarnar í Føroyum.