Minningardagur teirra deyðu í ferðsluni verður sunnudagin

Sunnudagin 1. juli er dagurin, har vit steðga á og minnast tey, sum doyðu í ferðsluni og tey, sum liva við missinum.

Síðani Minningardagin í fjør eru tvey deyð í ferðsluni sambært skrásetingunum hjá Ráðnum fyri Ferðslutrygd.Tað er vanlukkuligt at missa fólk í ferðsluni fyri eitt samfelag ??? og í einum lítlum samfelagi sum Føroyar, verða øll ávirkað.

Tíðliga sunnumorgunin fara sjálvboðin, teirra millum limir í felagnum Føroya Ellisakfør, runt at leggja blómutyssi út, har ferðsluvanlukkur, sum hava kravt mannalív, hendu. Í kirkjum og samkomum verður evnið stundum tikið upp hendan dag.

Endamálið við tiltakinum er í fyrra lagi at fyribyrgja ferðsluvanlukkum og í øðrum lagi at fáa okkum øll at steðga á eina løtu og hugsa um tey, vit hava mist og tey, sum sita eftir.