Koronakanningarnar verða á Eirargarði sunnudagin

Landssjúkrahúsið hevur sett upp nýggja kanningarmiðstøð á Eirargarði, og nú kunnu øll lata seg kanna. Ávísing frá lækna krevst ikki.

Í dag, sunnudagin 9. august, verður kannað frá klokkan 13 til 16.

Eftir ætlan verða kanningar gjørdar gerandisdagar frá klokkan 17 til 19, men hesar tíðir verða lagaðar eftir tí tørvi, sum er í samfelagnum. Seinastu dagarnar hevur ovurstórur áhugi verið millum manna at lata seg kanna og bíðirøðirnar langar.

Ferðsluviðurskiftini eru munandi frægari á Eirargarði, og Landssjúkrahúsið metir sum heild, at umstøðurnar at skipa fyri koronakanningunum verða betri enn á J.C. Svabosgøtu.

Størsta broytingin er tó, at nú er ikki longur neyðugt at fáa ávísing frá kommunulækna, áðrenn tú letur teg kanna. Fólk skulu bara møta upp í bili, og so taka røsku starvsfólkini sær av kanningunum og allari neyðugari skráseting.

Skeltir eru sett upp, sum vísa vegin, tá ið fólk nærkast Eirargarði.