Í Vágum velja vit fremmandafólk at umboða okkum

Atkvøðubýtið millum lokal valevni og onnur á Løgtingsvalinum í 2015 prógvar hetta í ólukku mát.

Bert góð 45% av Vágafólki høvdu so frægt álit á okkara lokalu valevnum, at tey atkvøddu fyri teimum, meðan heili 55% atkvøddu fyri fremmandum valevnum ella listanum.

Í valstaðnum í Sørvági var tað so frægt, at har atkvøddu 54% fyri lokalum valevnum, meðan 46% atkvøddu fyri fremmandum valevnum ella listanum.

Í valstaðnum á Giljanesi var heilt bedrøviligt. Har atkvøddu bert 41% fyri lokalum valevnum, meðan heili 59% atkvøddu fyri fremmandum valevnum ella listanum.

Eg má bara spyrja, halda vit okkum í Vágum vera so vánalig, at vit noyðast at velja fremmandafólk at umboða okkum???

Ella er tað lættari at velja tey, tí vit ikki kenna tey og teirra veikleikar???

Ikki rokni eg við, at hesi fremmandu hugsa nógv um lokaløkið her vesturi, tað haldi eg vera sjón fyri søgn. Mær vitandi er bert ein millión játta til arbeiði her vesturi í 2019. Hon verður brúkt til súkklubreyt á Leitinum í Sandavági.

Vóni at okkara lokalu valevni fáa fleiri atkvøður á løgtingsvalinum komandi oyggj okkara at frama.

Gott val!!!

Georg H. Hansen

Gerðisgøtu

Miðvági

Nb: Tølini havi eg frá kvf.fo/val