Ferðavinnan í Vágum gongur undan

Felagið Vágar hevur í mong ár rikið kunningardiskin á flogvøllinum og eisini eina kunningarstovu, sum menti ferðavinnuna í oynni. Stórsta orkan fór til kunningardiskin, at greiða fólki frá hvar tey finna eitt WC, nær bussurin koyrir o.l. Lítil orka var til at menna ferðavinnuna í oynni.

Fyri tveimum árum síðani fór nevndin í Felagnum Vágar undir eina tilgongd at broyta hetta. Vit fóru grundiga til verka og hava broytt bygnaðin heilt. Nú eru tað báðar kommunurnar í oynni, sum taka sær av Visit Vágar. Ein samstarvsavtala er gjørd ímillum kommunurnar og í samstarvsnevndini sita borgarstjórarnir og formenninir í vinnunevndunum. Hetta er eitt stórt framstig, og í veruleikanum ganga vit undan í Føroyskum høpi, og vera vit ein fyrimynd fyri onnur øki og kommunur. Oyggin er jú ein náttúrlig eind, og ferðafólkini hvørki kenna til, ella leggja í kommunal mørk.

Visit Vágar hevur sett Odu Andreasen at gera ein ferðavinnupolitikk fyri økið. Hesin verður liðugur í hesum mánaðinum, og vit hava júst sett nýggjan leiðara fyri at seta politikkin í verk. Vit meina at karmarnir fyri Visit Vágar nú eru í tryggari legu, og at hetta kemur oynni til góðar, bæði aktørum í ferðavinnuni, borgarum, vinnu og okkum øllum.

Tað, sum nú hevur stóran týdning, er at samstarvsavtalan ímillum kommunurnar báðar, kemur at virka í verki. Í henni sita borgarstjórarnir og formennirnir í vinnunevndunum.

Borgaralistin ynskir at ferðavinnan fær bestu kor at virka undir til gagns fyri allar áhugabólkarnar í oynni.

Set X við Heðin Poulsen

Set X við Borgaralistan