Rottan kann gera óbótaligan skaða á fuglastovnarnar

Spyrjari: Fía Selma Nielsen, løgtingskvinna 

Svarari: Eyðdis Hartmann Niclasen, landsstýriskvinna

Evni: Rottutýning í Føroyum

Spurningar:  

1. Hevur landsstýrið ætlanir um at gera nakað við at samskipa rottutýningina saman við kommununum?
2. Hvørjar ávirkanir metir landsstýriskvinnan, at einar rottufríar Føroyar høvdu havt á fuglastovnarnar í Føroyum?
3. Hvørjar ávirkanir metir landsstýriskvinnan, at einar rottufríar Føroyar høvdu havt á burðardygdina í føroysku náttúruni annars?

Viðmerkingar:

Kommunurnar hava ábyrgdina av rottutýningini.

Rotta er eitt skaðadjór, sum ger óbótaligan skaða á okkara náttúru, serliga okkara fuglalív. Rotta kann gnaga gjøgnum alt, sum er bleytari enn jarn. Rotta ger tískil stóran materiellan skaða, eitt nú á ravmagnsútgerð og spillivatnskipanir. Harafturat er rotta ein smittuberi, sum ber sjúkur millum menniskju og millum djór, men eisini frá djórum til menniskju.

Rotta legst í fuglabjørg og -bøli, og etur fuglaeggini. Hon kann gera óbótaligan skaða á fuglastovnarnar, sleppur hon framat.

Í Føroyum er tað serliga tann brúna rottan, sum nervar náttúru og menniskju. Tann brúna rottan verður kynsbúgvin tá hon er millum 8 og 12 vikur gomul. Hon leggur 2-7 ferðir árliga, og fær einar 8-10 ungar hvørja ferð.

Fermetratalið í Føroyum er avmarkað. Tí átti at verið gjørligt, t.d. við felags innsatsi millum land og kommunur, at týnt rottuna í Føroyum.

Tað sær ikki út til, at kommunurnar megna uppgávuna at týna rottuna í Føroyum.

Tí verða hesir spurningar settir.

Á Løgtingi, 3. september 2026

Fía Selma Nielsen