Nýggj nevnd vald í Vága tjóðveldisfelag

Nevndin skipaði seg eftir fundin soleiðis:

• Hergeir Teitsson, forfólk og umboð í aðalstjórnini
• Jana Antonsdóttir Dam, skrivari
• Sølvi Simonarson, peningarøkil

Nýggja nevndin hevur longu sett sær fleiri ætlanir um tiltøk og temakvøld, sum verður kunnað nærri um seinni, sum tíðindaskriv á miðlunum og á facebook síðuni hjá Vága tjóðveldisfelag. Limir kunnu eisini senda okkum ein teldupost á [email protected] um tey ynskja at fáa beinleiðis kunning frá felagnum.

Eisini gleðir nýggja nevndin seg til at hitta nýggju leiðsluna í Tjóðveldi, og at bjóða forkvinnuni Sirið Stenberg og næstforkvinnuni Hervør Pálsdóttir, saman við aðalstjórnarformanninum Høgna í Stórustovu vestur á vitjan.

Á fundinum var eisini vitjan av Jóhan Christiansen, nýggja landsstýrismanni í fiskivinnu- og samferðslumálum. Hann greiddi frá teimum málum, ið hava ligið fremst á dagsskránni hjá honum higartil. Millum annað nevndi hann broytingarnar í sjófeingislógini, og hann staðfesti, at nógvur eftirspurningur hevur verið frá kommunum kring landið um at fáa landsstýrismannin á vitjan at tosa um vegakervið. Hann vísti eisini á, at hann er væl kunnaður av Landsverki um støðuna á landsvegakervinum.

Eitt av teimum nýggjastu átøkunum sum liggur á málsøkinum hjá landsstýrismanninum er dagføring av ferðaseðlaprísunum á bæði bygda- og oyggjaleiðum, sum nógv kjak hevur verið um seinastu dagarnar. Fundarluttakararnir høvdu nógvar spurningar til landsstýrismannin, og hann var væl fyrireikaður at svara og greiða frá síni støðu og sínum málsøki.