Mjølnir vann 3-1 á skjótt fyrrverandi føroyameistaranum Fleyr

Leingi hevur stigatalvan víst, at Fleyr fór at fáa tað trupult at náa FM-finaulunum í ár, og eftir 3-1 ósigurin fyri Mjølni í Klaksvík í gjárkvøldið eru allir matematisku møguleikarnir eisini troyttir, og tí er endaliga staðfest, at nýggjur føroyameistari skal finnast í ár. Og tað er eisini bara í teoriini, at finaluliðini ikki verða Mjølnir og SÍ, tí annað teirra skal tapa rest, og KÍF vinna rest, um kollfirðingar skulu megna at koma í finalunar.

Í dystinum í gjár var tað tó Fleyr sum legði betur fyri og vann fyrsta sett. Fleyr legði seg á odda 5-1 og 9-4, men so vendi, og við at vinna 12 av teimum næstu 16 stigunum fór Mjølnir framum 16-13. Fleyr fór tó framumaftur 23-22 og vann settið 27-25 við triðja settbóltinum.

Fleyr var flúgvandi frá byrjan av øðrum setti og legði seg á odda 9-4, 11-5 og 14-9. Men við eitt vekk var munurin burtur, og Mjølnir javnaði til 17-17. Fleyr togaði seg tó framumaftur 21-20 og 23-22, men so vann Mjølnir næstu tríggjar bóltarnar og settið 25-23.

Eftir hetta setti Mjølnir seg tungt á dystin og fór sum ein ódn gjøgnum næsta sett og legði seg á odda 11-3, áðrenn settið varð vunnið 25-11.

Fleyr megnaði at fylgja við til 10-10 í fjórða setti, tá Mjølnir gjørdi eitt skarvslop og legði seg á odda 16-11 og síðan vann settið 25-17.