Jóanis Albert Nielsen
Eftir ein tryggan og sannførandi 2-0 sigur á Moldova fríggjakvøldið, leggja føroysku kvinnurnar nú alla orku í fyrireikingarnar til annan dystin í hesum umfarinum, sum verður týsdagin 8. apríl klokkan 17:00, tá Gibraltar kemur á vitjan.
Men landsliðsvenjarin, Pætur Smith Clementsen verður noyddur at gera eina broyting í hópinum til komandi uppgávu. Malena Olsen hevur fingið ein lítlan skaða at dragast við, og hon verður ikki nóg birg til landsliðsfótbólt longu týsdagin.
Í staðin hevur venjarin sent boð eftir Mariu Vinjardsdóttir Johansen úr KÍ, ið higartil er skrásett fyri ein A-landsdyst fyri føroyska kvinnulandsliðið.
Aftaná 2-0 sigurin á Moldova fríggjakvøldið eru Føroyar nú nummar 2 í bólkinum við 6 stigum. Slovakia er fremst við 9 stigum, Moldova hevur 3, meðan Gibraltar framvegis hevur fyrsta stigið til góðar.
Atgongumerki til UEFA Nations League dystin millum Føroyar og Gibraltar fáast til keyps í nethandilinum á FSF.fo, og á atgongumerki.fo. Kostnaðurin er 95 kr. fyri vaksin, meðan tað er ókeypis atgongd fyri børn og ung (0-16 ár), ið tó skulu skráseta seg fyri einum atgongumerki í nethandilinum ella á atgongumerki.fo.
Vinarliga broyt tínar kennifíla - og privatlívsstillingar fyri at síggja hetta innihald