![placeholder](https://jn.fo/css/img/banner2x1.png)
SOR bygningurin í Føroyum var ein av fregnarstøðunum, sum vóru skipaðar av Malta í suðri til Íslands í norði, sum allar sendu frágreiðingar til herleiðsluna í London, so hon kundi gera sær neyvari metingar um hóttandi krígsgongdina á ymsum hermótum.
Royal Air Force stóð fyri rakstrinum og hevði úrvald herfólk til arbeiðis, sum dagliga mettu um upplýsingarnar, tey fingu úr øllum landinum, frá skipum, flogførum og grannalondum. RAF og herleiðslan í Vágum fylgdu við krígsgongdini á stóra kortinum á vegginum í SOR bygninginum, sum var dagført alt samdøgrið.
Krígsárini sluppu bara úrvaldu herfólkini inn í SOR bygningin, tí alt var hildið loyniligt innanveggja, men nú er SOR bygningurin karmur um føroyska Krígssavnið, sum sigur frá søgum og sýnir fram lutir frá seinna heimsbardaga.
Krígssavnið við flogvøllin í Vágum er opið fyri almenninginum leygardag og sunnudag frá klokkan 14 – 17 fram til endan av september. Kostnaður fyri atgongumerki er 50 krónur, børn undir 13 ár sleppa inn ókeypis.
Tað ber eisini til at skipa fyri bólkavitjanum aðrar dagar í vikuni. Áheitanir um bólkavitjanir avgreiðir Karl Johan Nielsen á tlf. 221940 og teldupostadressu [email protected]. Meira fæst at vita á heimasíðuni ww2.fo
![placeholder](https://jn.fo/css/img/banner2x1.png)
Vinarliga broyt tínar kennifíla - og privatlívsstillingar fyri at síggja hetta innihald