Jóanis Nielsen
Tað eru fimm spurnakanningarnar til brúkarar og fýra vinnubólkar, ið eru grundarlagið at gera upp konjunkturbarometrið. Tær hava verið gjørdar tvær ferðir árliga síðani 2006. Nýggjastu spurnakanningarnar eru gjørdar í juni.
Í tíðini áðrenn koronufarsóttin rakti fyri góðum tveimum árum síðan, lá treystitalið í lutfalsligari støðugari legu. Treystitalið fall síðan frá 32 til -16 í kanningini á sumri í 2020, ið er størsta fall í barometrinum síðan 2006, tá ið fyrstu kanningarnar av hesum slag vórðu gjørdar. Síðan er treystitalið hækkað aftur og er nú á 29, ið er nærum á sama stigi sum áðrenn koronufarsóttin rakti.
Talvan niðanfyri vísir vísitølini fyri hvørja kanning sær. Til hvørja av hesum fimm kanningunum ber til at finna fram nettotølini í hagtalsgrunninum fyri hvønn einstakan spurning í ymsu kanningunum.
Januar 2020 til juni 2022
| 2020M01 | 2020M06 | 2021M01 | 2021M06 | 2022M01 | 2022M06 | |
|---|---|---|---|---|---|---|
| Treystitalið | 32 | -16 | -9 | 11 | 29 | 29 |
| Brúkarar/húsarhald | 5 | 0 | 7 | 10 | 5 | -5 |
| Tilfeingisvinnan og annar ídnaður | 35 | -28 | -19 | 15 | 22 | 24 |
| Byggivinnan | -1 | -34 | -24 | -10 | 24 | 12 |
| Handilsvinnan/smásøla | 29 | 15 | 13 | 6 | 12 | 1 |
| Tænastuvinnan | 53 | -13 | -7 | 9 | 57 | 65 |
Húsarhaldini gerast varnari
Ávísin fyri húsarhaldini er í hesi kanningini -5, ið er ein minking á 10 stig í mun kanningina í januar. Vit skulu heilt aftur til 2011 fyri at síggja ein lægri ávísa. Brúkarakanningin hevur sostatt víst, at føroyski brúkarin ikki hevur latið seg stórvegis ávirka av koronu, men búskaparstøðan í dag við hægri prísum ávirkar helst húsarhaldini.