Hagstovan:

Flestu flytingar millum Føroyar og útlond eru í juni, juli og august. Fleiri flyta til Føroyar um summarið umframt at fleiri flyta av landinum, millum annað í lestrarørindum. Hetta sæst aftur í fólkatalinum soleiðis, at tað fyrst veksur meiri enn vanligt fram móti august og síðani minkar aftur. 

Fólkatalið verður ávirkað av nettoflyting, sum er munurin millum til- og fráflyting, og burðaravlopi, sum er munurin millum fødd og deyð. Fólkavøksturin seinastu tólv mánaðirnar taldi 303 fólk og kom av einum burðaravlopi á 131 og eini nettoflyting á 172 fólk.  

Fólkavøksturin seinastu tólv mánaðirnar var minni enn í undanfarna tíðarskeiði. Munurin á 180 fólk sæst aftur bæði í burðaravlopinum og nettoflytingini. Burðaravlopið var á leið 80 fólk minni enn í undanfarna tíðarskeiði, serliga, tí færri vóru fødd. Nettoflytingin var um 100 fólk minni enn í undanfarna tíðarskeiði, tí hóast færri fluttu av landinum enn í undanfarna tíðarskeiði, so vóru tað uppaftur færri, sum fluttu til landið. Sí fleiri tøl í talvuni niðanfyri. 

Færri verða fødd

Trendarnir í myndini niðanfyri lýsa mánaðarligu gongdina í føði- og deyðatalinum. Meðan gongdin í deyðatalinum hevur funnið eina legu, sum liggur um 35 í miðal um mánaðin, vísa trendarnir, at støðugt minkandi gongdin í føðitalinum heldur fram. Trendurin fyri føðitalið er seinastu trý árini farin úr 54 børnum niður í 44 børn í miðal um mánaðin. 

Færri flyta

Trendarnir í myndini niðanfyri vísa mánaðarligu gongdina í til- og fráflytingini. Gongdin í bæði til- og fráflytingini er minkandi. Tilflytingin er tó minkað nakað meiri enn fráflytingin, og tað minkar um nettoflytingina. Seinasta hálvtannað árið er nettoflytingin fyri hvørt tólv mánaða skeið minkað niður í helvt. 

Størsti vøkstur í størstu kommununum

Í kommununum var fólkavøksturin størstur í Tórshavnar, Nes, Klaksvíkar og Vága kommunum. Kommunurnar við størstu afturgongd í fólkatalinum vóru Vágs, Sunda og Eiðis kommunur, har fólkatalið minkaði við yvir 30 fólkum í hvørjari kommunu seinasta árið. Talvan niðanfyri vísir fólkatalið í kommununum við tilhoyrandi bygdum 1. september 2023 og 2024. Gongdin í fólkatalinum í einstøku bygdunum sæst her.