Jóhan í Niðristovu fekk loyvið á Sandi

Umhvørvisstovan er nú liðug at viðgera innkomnu umsóknirnar um el-framleiðslu úr vindorku í Klivaløkshaga á Sandi, og avgerð er tikin um at veita Vindorku hetta loyvið. Talan er um eitt felag undir stovnan við Jóhan í Niðristovu og øðrum, har sonevndi byrjunarprísurin er 26,97 oyru/kWt.

- Talan er um sjey Vestas V-117 vindmyllur til ein samlaðan mátt á 30 MW við møguligari el-framleiðslu á 150 GWt/ár, siga tey á Umhvørvisstovuni í dag.

Umsóknir komu frá fýra umsøkjarum:

* Vindorku (undir stovnan) v/ Jóhan í Niðristovu o.ø.

* Orkufelagnum Magn

* Vindfelag hjá SEV

* Felag undir stovnan v/ Effo

Umhvørvisstovan vísir á, at hendan vindmylluverkætlan er eitt týðandi stig at koma nærri málinum í almenna orku- og veðurlagspolitikkinum at gera Føroyar meira leysar av olju og harvið at kunna minka um okkara Co2-útlát.

- Endaligt loyvi til vindmylluverkætlanina í Klivaløkshaga er treytað av, at onnur neyðug loyvi eisini fáast til vega, eitt nú loyvi frá Yvirfriðingarnevndini, loyvi frá Sands kommunu - og at endalig avtala eisini fæst við viðkomandi jarðareigarar í økinum, verður sagt á Umhvørvisstovuni í dag.