Gistinæturnar vóru góðar 200 færri í september samanborið við sama mánað í fjør. Gistinætur telja, hvussu nógvir og hvussu leingi persónar gista á gistingarhúsum.

Flestu gistingarnar eru í Tórshavnarøkinum. Í september vóru sløk 90% av gistingunum í Tórshavnarøkinum. Tað er á leið sama býti sum í september í fjør.

Tá koronufarsóttin herjaði, vóru ferðafólkini færri, og føroyingar høvdu størstapartin av gistináttunum á gistingarhúsunum í hesum tíðarskeiðnum. 

Í september áttu danir 36% av gistináttunum, og talið av gistináttunum hjá fólkum úr øðrum londum enn Danmark og Føroyum er komið upp á 48%. Føroyingar áttu 16% av gistináttunum.

Færri føroyingar og danir gistu á føroysku gistingarhúsunum í september borið saman við í fjør. Hinvegin vóru stívliga 30% fleiri útlendsk ferðafólk úr øðrum londum enn Danmark.

Fleiri innskrivingar

Innskrivingarnar vóru stívliga 8.200 í september. Tað er 4% fleiri enn í september í fjør. Innskrivingarnar vísa talið av ferðafólkum á gistingarhúsunum, sama hvussu leingi tey gista.

Meira enn helmingurin av kømrunum brúkt

Nýtslustigið vísir, hvussu stórur partur av tøku kømrunum verður brúktur. 57%  av kømrunum vórðu brúkt í september. Tað er á leið á sama stigi sum í september í fjør, tá 62% av kømrunum vóru brúkt.

40% fleiri gistingar og innskrivingar higartil í ár

Verður hugt at tølunum higartil í ár, sæst at gistingarnar eru 40% fleiri og innskrivingarnar eru 37% fleiri í mun til sama tíðarskeið í fjør.