Tey, sum eru slitin og troytt, skulu sleppa frá fyri aldur fyrr enn onnur

Landsstýrið leggur uppskot um sonevnda “Tíðartreytaða pensjón” fyri tingið seinnapartin í dag. Hetta merkir, at tey sum hava arbeitt síðani tey vóru 16 ár ella eldri kunnu fara á pensjón aftaná 50 ár á arbeiðsmarknaðinum.

Fyri Javnaðarflokkin hevur tað alstóran týdning, at tey, sum eru slitin og troytt, skulu sleppa frá fyrr. Tað er bæði rætt og rímiligt, tí hesi fóru á arbeiðsmarknaðin fleiri ár áðrenn tey, sum hava fingið sær útbúgving.

Uppskotið fevnir um tey, sum hava verið á arbeiðsmarknaðinum, síðani tey vóru 16-19 ára gomul, og tryggjar fólki, sum hava arbeitt í minsta lagi í hálva tíð í 50 ár tilsamans.

Í uppskotinum verður hædd tikin fyri barnsburðarfarloyvi, umframt arbeiðsloysi, sjúkrafráveru og líknandi, so hesi verða íroknað virkni á arbeiðsmarknaðinum.

Lógaruppskotið verður galdandi, tá ið pensjónsaldurin byrjar at hækka í 2035.

- Tað hevur týdning fyri okkum í Javnaðarflokkinum, at vit fáa eina serliga skipan, sum loftar teimum, ið frá ungum árum hava verið arbeiðsvirkin, sigur Hans Jacob Thomsen, tingmaður og limur í Trivnaðarnevdini, sum fegnast um, at landsstýrismaðurin í samráð við meirilutan í Trivnaðarnevndini nú leggur uppskot fram um tíðartreytaða pensjón.