Stand-up við limum úr Linie 3

Hvat var tað sum hendi, tá ið tríggir næmingar á sjónleikaraskúlanum í Århus gjørdust ein landaplága, eftir at teir høvdu verið partur av eini danskari sjónvarpssending í 1980?

Henda spurningin kanst tú fáa svaraðan, tá Anders Bircow og Thomas Eje trína á pallin í Norðurlandahúsinum tann 27. og 28. apríl 2024 við sýningini "Her er de 2 andre". Talan er um eina skemti- og tónleikasýning um Linie 3.

Sýningin er ein ærlig sjálvsmynd, ið lítur aftur á farnu tíðina og dyggu undirtøkuna, ið Linie 3 hevur havt tey seinastu 40 árini. Áskoðararnir sleppa at enduruppliva fleiri av hæddarpunktunum, ið hava verið gjøgnum árini og eisini verða nýskrivaðar tvírøður á skránni. Sýningin er eisini ein ærlig og eym frásøgn um alt, ið hendi handan leiktjøldini. Undran, ørkymlan, kreppa, gleði og tár.

Anders Bircow og Thomas Eje siga, at teir síggja fram til at vitja í Føroyum.