Niels Juel vann silvur við EM-Masters í vektlyfting

Kappingin stóð serliga við svenskaran Lars Ekman, sum á yngri árum var ein av bestu svensku vektlyftarunum og í gjár vann gull, og grikkan Dimitrios Tzimas, sum í gjár vann bronsu. Niels Juel lyfti 197 kilo samanlagt; 80 kilo í trekk (snatch) og 117 kilo í stoyt (clean and jerk).

Stoytið á 117 kilo er føroyskt met vektbólkinum 109+ kilo í opnum bólki og í masters 55-59 ár. Hetta lyftið í stoyt var samstundis tað besta í hesum bólkinum í gjár, men sviin lyfti meira í trekk, samtundis sum Niels Juel fekk kolldømt 86 kilo lyft í trekk.

Masters kappingar í vektlyfting eru vælumtóktar, og hava verið hildnar síðani 1991. Í fjør var kappingin í Hollandi og komandi ár í Írlandi. Samanlagt luttaka 565 luttakarar, 220 kvinnur og 345 menn úr 30 londum í ár. Russland luttekur ikki hesaferð og fáir ukrainar.

Føroyar eru limir í norðurlendsku vektlyftarasamgonguni NWF, men ikki enn í europeiska EWF og altjóða IWF. Niels Juel luttók tí í hesi kappingini vegna Danmark og danska felagið AK Atlas í Slagelse. Tó við Merkinum um hálsin við heiðursmerkjahandanina. Fyrr í ár vann hann DM-Masters.

Føroya Styrkisamband hevur í løtuni umsóknir um limaskap inni hjá EWF og IWF, og ábendingar eru um, at IWF og EWF fara at brúka sama leist sum NWF. Tað vil siga at flokka Føroya sum eitt sonevnt ‘ítróttarland’ og síðani geva Føroyum fullan limaskap. 

Kappingarnar verða stroymdar.