Maður revsaður fyri at hava svævað eina ær

Ein maður var í Føroya Rætti í mai í ár dømdur fyri skammfaring av eini ær. Maðurin hevði svævað ærina uttan at hava nýtt nøktandi doyving áðrenn. Sambært djóravælferðarlógini er tað at meta sum skammfaring at svæva uttan nøktandi doyving áðrenn. 

Føroya Rættur gav manninum eina sekt fyri brotið. 

Ákæruvaldið kærdi málið til Eystara Landsrætt við pástandi um, at maðurin skuldi verða dømdur fongsulsrevsing fyri brotið. Ákæruvaldið gjørdi galdandi, at djóravælferðarlógin ikki heimilar sektarrevsing fyri skammfaring, og at maðurin tí skuldi dømast eina fongsulsrevsing. 

Landsrætturin tók undir við ákæruvaldinum og dømdi mannin 20 daga treytaða fongsulsrevsing.