KÍF vann aftur á Mjølni

Annan sunnudag á rað møttust KÍF og Mjølnir – hesa ferð í Kollafirði - og júst sum seinast í Klaksvík gjørdist úrslitið aftur 3-1 til KÍF.

Púra javnt gekk á í fyrsta setti, til støðan gjørdist 14-14, tá kinkur kom á hjá Mjølni, sum bara vann tvey stig aftrat, og so vann KÍF 25-16.

Eisini annað sett hjá Mjølni sá út til at vera farið í ommu sína, tá KÍF hevði lagt seg á odda 16-8, men 14 bóltar seinni var Mjølnir farið framum 20-18 og vann síðan settið 25-22 við tí fjórða av teimum seks settbóltunum.

KÍF var aftur omaná í triðja setti, har munurin vaks upp fýra stig, áðrenn hann minkaði aftur niður í 20-19, tá KÍF sleit seg leyst og vann 25-20.

Í fjórða setti megnaði Mjølnir ikki at koma afturíaftur, eftir at KÍF hevði lagt seg á odda 10-3 og 16-6, og endin varð, at KÍF vann 25-13.

Hjá KÍF vóru tað serliga tær tríggjar Elsa Samuelsen, Sesilia Johnsdóttir Prior og amerikanska Daria Burrows, sum vunnu nógv av stigunum við ávikavist 20 (harav 7 serviess), 14 og 21 í part. Hjá Mjølni skaraði Osla Johannesen framúr við 17 stigum – harav 4 vóru serviess. Ingibjørg Sigridardóttir Müller og Sirið Hanusardóttir Samson stóðu fyri ávikavist 9 og 8 stigum. Í blokkunum vóru, sum so mangan, Óluva Mohr (KÍF) og Sirð Hanusardóttir Samson (Mjølnir) stinnastar við ávikavist trimum og tveimum blokkum hvør.

Við teimum trimum stigunum fyri dystin kemur KÍF upp á 17 stig, bara tvey aftanfyri Fleyr, sum er nummar tvey, sum gevur sæti í FM-finalunum. Tó skal havast í huga, at Fleyr hevur spælt tveir dystir færri.

Dráttur – TB 0-3 (7-25, 12-25, 10-25)
Við tryggum sigri á Drátti leygardagin, hevur TB lagt seg á fjórðaplássið í Hotel Djurhuus-deildini, bert eitt stig aftanfyri KÍF, sum hevur spælt ein dyst meira, og trý stig aftanfyri Fleyr, sum hevur spælt ein dyst færri.

Næsta leygardag tekur TB ímóti oddaliðnum SÍ og sunnudagin vitjar Dráttur Fleyr.