Ikki síðani 2004 hava fleiri grindahvalir lagt beinini sama dag

Tað eydnaðist at fáa springarnar burturúr, og var ein grind hildin til í Vestmanna, sum taldi 266 hval. Tá ið grindin ið Vestmanna hevði lagt beinini, var aftur boðað frá grind norðanfyri Slættanestanga, og var hon hildin til á Leynum. Seinna grindin ið legði beinini taldi 178 hval.

Eftir at stóra grindin legði beinini í gjár hava vit hugt á heimasíðuna heimabeiti.fo, sum skrásetur m.a. alt um grind í Føroyum.

Hugt hevur verið eftir teimum døgunum har fleiri enn 200 hval hava lagt beinini sama dag.

Vit hava hugt frá 1976 fram til dagin í dag. Vit kunnu skjótt staðfest við tølunum frá heimabeiti.fo, at tað ganga nú longri ímillum at fleiri enn 200 grindahval leggja beinini sama dag, men hesi seinnu árini er tað ofta komi fyri, at nógvir springarar leggja beinini sama dag.

Ikki síðani 2004 hava fleiri grindahval lagt beinini enn í gjár. Tað var tá ið grind var hildin til í Bø tann 08. Juni í 2004 tá ið 445 hval løgdu beinini. Í gjár løgdu 444 hval beinini.

Um hugt verður longur aftur, so legði ein grind beinini í Miðvági tann 29. Juni í 1994, hon taldi 666 hval.

Nevnast kann eisini at 16. juli í 1992 løgdu fýra grindir beinini. Tað var í Bø, Miðvági, Vestmanna og Leynum. Tær taldu tilsamans 657 hval.