Fleyr er í FM-finalunum

Við 3-0 sigri á KÍF, og við hjálpandi hond frá SÍ, sum vann 3-0 á TB, hevur Fleyr spælt seg í FM-finalurnar, har mótsøðuliðið verður júst SÍ.

Fleyr livdi hættisliga í fyrsta setti, har støðan gjørdist 24-24, men við serviessi frá Helenu Skylv Hansen trygjaði Fleyr sær settið 26-24. Síðan var stórur munur, og Fleyr vann tey bæði næstu settini 25-19 og 25-14.

Setningurin hjá Fleyr var nú útintur, og eftir var at bíða eftir lagnuavgerðini í Sørvági, har TB skuldi vinna á greiða oddaliðnum SÍ, um tvørakvinnur skuldu taka finaluplássið frá havnarkvinnum.

Her vísti SÍ skjótt, at tað er stórfavorittur at gerast føroyameistari, tí fyrsta og annað sett vórðu vunnin 25-8 og 25-10.

Í triðja setti var spenningur kortini í, og TB legði seg framum so mikið sum 14-8, men leiðslan hvarv sum døgg fyri sól, og SÍ javnaði til 15-15. TB helt tó fast og hevði tveir settbóltar, men SÍ javnaði aftur og vann settið 26-24 og harvið dystin 3-0.

Tað merkir samstundis, at TB kann ikki fáa Fleyr á øðrumplássi aftur, og tí verða tað SÍ og Fleyr, sum skulu spæla FM-finalur.

Støðan í Føroya Tele-deildini hjá kvinnum: