Betri gøtur til borgararnar

Í fleiri førum hava tey ungu í skipanini "Ung í arbeiði" havt uppgávuna at lúka og hampa um gøturnar. Tey eru sera røsk, tí tað liggur nógv og hart arbeiði at lúka og hampa um. Hóast hetta er eitt gott stig á leiðini, er tað ikki nóg mikið til at tryggja, at gøturnar hóska til allar brúkarar – ung sum eldri, umframt tey, sum ganga við barnavogni ella nýta súkklu.

Nú er gartnaratoymið hjá kommununi fari undir eitt átak, sum er eitt størri og meira miðvíst viðlíkahaldsarbeiði av gøtunum í bygdunum.  Hetta merkir, at fleiri av gøtunum verða umvældar frá grundini, so tær kunnu nýtast í nógv ár framyvir. Arbeiðið verður framt stigvíst, og av tí at tað eru nógvar gøtur, verða tær ikki allar gjørdar samstundis.

Ætlanin er at raðfesta tær mest slitnu gøturnar fyrst og síðani arbeiða seg víðari, eftirsum tíð og arbeiðsorka loyvir tí. Hetta fer at gerast eitt árligt tiltak, har ein partur av gøtunum verður umvældur og viðlíkahildnar, so at allar gøtur í kommununi við tíðini fáa ta neyðugu røktina.

Tað hevur longu víst seg, at gartnaratoymið dugir væl at røkja slíkt arbeiði, tí tey hava víst ágrýtni og dugnaskap í fríðkanini av bæði viðarlundum og øðrum økjum í bygdunum. Seinastu árini hava tey staðið fyri fleiri verkætlanum, har trø og blómur eru gróðursett, almenn fríøki eru hildin í góðum standi, og grótgarðar og vegjaðarar eru bøttir. Arbeiðið við gøtunum er ein liður í hesari ætlan um at skapa ein vakrari og meira framkomuligar bygdir, har borgarar trívast og kunnu njóta náttúruna í sínum nærumhvørvi.

Hetta arbeiðið er ein beinleiðis avleiðing av íløguni, sum býráðið hevur gjørt, við at seta eitt serligt gartnaratoymi, ið hevur fokus á grønu økini í kommununi. Nú várið er komið, og tað byrjar at grønkast, fara vit veruliga at síggja avleiðingarnar av hesum átaki. Kommunan væntar, at hetta fer at hava eina jaliga ávirkan á umhvørvið og skapa eitt vakrari stað fyri borgarar at búgva og røra seg í.

Við hesum tiltaki vóna kommunan og býráðið at tryggja, at borgarar fáa betur gøtur, sum kunnu brúkast trygt og væl av øllum – uttan mun til aldur og førleikar – og samstundis skapa eitt meira grønt trivnaðar umhvørvi í kommununi.