Bakmenn í máli um rúsevnasmugling til Føroyar handtiknir í Danmark

Tríggir danskir menn, sum eru 39, 41 og 46 ár, og sum eru partur av organiseraða kriminella umhvørvinum í Danmark, eru handtiknir.

Politiið í Eysturjyllandi og á Fyn hava hjálpt til í handtøkuatsóknini og í rannsóknunum, sum eru framdar í dag.

Teir tríggir menninir eru skuldsettir fyri at hava lagt til rættis innsmugling av uml. 4 kg av amfetamin og uml. 22 kg av hasji við seglbáti úr Danmark til Føroyar við tí endamáli at selja víðari.

Føroya Politi og NSK hava arbeitt tætt saman í samband við kanningararbeiðið. Harumframt hava bæði TAKS og Skattestyrelsen í Danmark hjálpt politinum við kanningararbeiðnum.

Leiðandi politiinspektørur í NSK, Michael Kjeldgaard, sigur:
"I tæt samarbejde med Færøernes Politi har vi i dag anholdt flere personer fra det organiserede kriminelle miljø, som vi vurderer står bag indsmugling af narkotika fra Danmark til Færøerne. Sagen er opstået på baggrund af dygtigt politiarbejde af Færøernes Politi, som i august 2024 anholdt fem personer, der skulle levere og modtage hård narkotika på Færøerne. Nu har vi taget de personer ud af spil, som efter vores opfattelse er bagmændene i organisationen."

Fýra av teimum fimm persónunum, sum vóru varðhaldsfongslaðir í august 2024 fyri innsmuglingina, sita framhaldandi í varðhaldi. Málið er ásett at vera viðgjørt í Føroya Rætti í viku 10.

Menninir, sum eru 39 og 46 ár, og sum eru handtiknir í dag, verða mikudagin framstillaðir í grundlógaravhoyring í rættinum í Aarhus. Ákæruvaldið fer at biða um, at hurðarnar verða afturlatnar.

Vísandi til áleikandi kanningararbeiðið hava Føroya Politi og NSK ikki fleiri viðmerkingar til málið í løtuni.