Langhylurin í Gundadali: Fyrsta skotið í dag

Fyrsta skotið í sambandi við Langhylin í Gundadali varð skotið í dag klokkan 14,15.

Tað vóru Heðin Mortensen, borgarstjóri, og Annfinn Brekkstein, varaborgarstjóri, sum trýstu á knøttin.

J. & K. Petersen vannlisitatiónina hin 1. oktober 2020 og varð sáttmáli undirskrivaður við Tórshavnar Kommunu hin 30. November 2020.

Verkætlanina, sum ætlandi skal vera liðug við árslok 2023, hevur ein høvuðstøkusáttmála upp á 147,5 mió. kr.

Tað er SNA sum hevur teknað og lagt Langhylin til rættis.

Í tilgongdini fram ímóti Langhylinum hevur Tórshavnar kommuna verið á fundum við altjóða svimjisambandið FINA. Sambandið hevur millum annað samskift við bygginevnd og teknisku fyrisiting í Tórshavnar kommunu um staklutir í uppskotinum fyri at taka øll neyðug atlit at krøvum til altjóða kappingar.

Langhylurin í Gundadali kann umframt allar føroyskar kappingar eisini hýsa altjóða kappingum nógv áratíggju fram í tíðina.