FSF: Nýggj kapping til A-landsliðið

Á aðalfundinum hjá UEFA, sum hevur verið í Astana í Kazakhstan hesa vikuna, hava øll 54 limalondini tikið undir við einum uppskoti um at arbeiða við eini nýggjari kapping fyri A-landslið, sum nevnist Nations League.

Nýggja kappingin skal eftir ætlan fara av bakkastokki á heysti í 2018, áðrenn farið verður undir undankappingina til EM í 2020.

Bólkar eftir styrkismeting
Vanligt hevur verið, at ein EM- ella HM-undankapping fer í gongd umleið tvey ár undan sjálvum endaspælinum. Men soleiðis verður ikki í sambandi við EM í 2020. Tá verður ikki farið í gongd við sjálva undankappingina fyrr enn á vári í 2019.

Ístaðin verður farið undir nýggju Nations League kappingina á heysti í 2018. Tey 54 londini í UEFA verða býtt upp í fýra deildir alt eftir, hvar tey liggja á styrkislistanum hjá UEFA.

Sambært fyribils upplegginum so vera í teimum báðum ovastu deildunum 12 lond í hvørjum, meðan 14 lond eru í triðbestu deildini og 16 í lægstu deildini, har sum Føroyar koma at vera, um styrkismetingin er á leið tann sum í dag.

Hvør deild verður síðani býtt upp í fýra bólkar, sum spæla hvør sítt bólkaspæl. Bólkaspælið verður spælt á heysti í 2018, og vinnararnir av einstøku bólkunum í ymsu deildunum spæla síðani seinni eitt finaluumfar.

Vinnararnir av teimum fýra finaluumførunum í einstøku deildunum tryggjar sær við sigrinum eitt pláss í EM-endaspælinum í 2020. Tað vil í veruleikanum siga, at eitt av teimum 16 veikastu londunum á styrkislistanum sleppur at spæla seg til EM-endaspælið.

Væl fleiri dystir
Nýggja kappingin kemur at hava við sær, at talið av landsdystum verður munandi hægri, enn tað hevur verið. Tilsamans kemur eitt land sum Føroyar at spæla í minsta lagi 16 landsdystir, sum er veruligir kappingardystir yvir tvey ár, har man í løtuni spælir um 10 dystir yvir tvey ár.

Tað kemur so eisini at hava við sær, at talið av venjingardystum millum lond lækkar munandi, og í stóran mun koma teir at detta burtur.

Skipanin av Nations League kemur at hava við sær, at føroyska landsliðið í størri mun kemur at spæla móti javnlíkum londum í Nations League, men framhaldandi fer man at spæla móti sterkari tjóðum í vanligu undankappingunum.

Aðalfundurin hjá UEFA hevur einmælt samtykt, at arbeiðast skal víðari við nýggju kappingini og nýggja kappingarleistinum, sum altso eftir ætlan fer av bakkastokki um bert fýra ár.