Eysturbúgvin og Vesturbúgvin aftur til fiskiskap í kvøld

 Eysturbúgvin og Vesturbúgvin, sum samtrola eftir gulllaksi, brutu túrin av leygardagin, tí annað skipið fekk tekniskar trupulleikar. 

Eftir at teir høvdu landað gulllaksin, fóru skipini á Havnina til skipasmiðjuna Mest, har teir liggja enn, men helst verður klárt at loysa aftur í kvøld.

Jóan Petur í Soylu skipari á Eysturbúgvanum sigur, at fiskiskapurin er heldur slakari enn hann hevur verið fyrr í ár, men tó brúkuligt. 

Í fjør vóru Eysturbúgvin og Vesturbúgvin á makrelinum, men Jóan Petur sigur, at um gulllaksafiskiskapurin heldur sær, so fara teir neyvan á makrelin, tí prísurin er somikið lægri í ár, at tað helst lønar seg betri at fiska gulllaks.